KNK
دیوانا بەرێز، ئامادەبویێن هێژا ئەڤ دەمێ هەوەباش و هوین بخێرهاتن
دەستوریێ بدەنە من بناڤێ هەڤال لقمان ئەحمێ بەرپرسێ پارتیا کەسکا دەموکرات ل روژ ئاڤا و پارتیا وان و وە هەروەسا بناڤێ پارتیا کەسکا کوردستانی ل باشور و رێکخراوا سەوز یا ئەوروپى و کوردستانى ، ئەڤروکە خو بەختەوەر دبینین ئامادەبونا مە ژبۆ رێڤەچوونا کونگرێ ( ٢٣ ) نەتەوەیى یێ کوردستانێ ، ئەڤ کونگرە ددەمەکێ دایە کو ل هەرچارپارچێن کوردستانێ کورد یێ ل خەباتێ و بەرخودانێدا بتایبەت ل روژئاڤا و باکوور ، دنهادا روژئاڤایێ کوردستانێ دبارودوخەکێ زور تایبەت را دەربازدبیت ، ل دەمێ روخانا ئەسەد وە هەتا پێشیا مەهەکێ بەرخودانەکا دژوار ل بەنداڤا تشرین و پرا قەرەقوزاغ و هەمى بەروکێن بەرەڤانیێ ل روژئاڤێ کوردستانێ دهاتە ماشاندن ژ لایێ گروپێن تیرورستیێن سەر ب ترکیا و درونێن ترکیاڤە و درونێن تورکیاڤە، هەروەسا وەسا کونگرێ یەکرێزی و یەکهەلوێستیێ هێزێن سیاسیێن روژ ئاڤا هاتیە گرتن جهێ فەخرو شانازیێ یە ، لەوما ئەم وەک پارتیا کەسک ل باشور و روژ ئاڤا ب ئەرکەک ئەخلاقی و نیشتمانی خو دزانین ب هەمی شیانێن خو پشتەڤان و هاریکار بین ژبۆ پاراستنا ستاتویا روژئاڤایێ کوردستانێ و ڤێ دەستکەفتێ .
ل باکوورێ کوردستانێ قوناغەکا مێژویى دەربازدبیت بتایبەت پشتى پەیاما ئاشتیێ یا بەرێز( عەبدولا ئوجەلان) رێبەرێ پارتیا کارکەرێن کوردستانێ ژبو پێڤاژویا ئاشتیێ و دانانا چەکی و خوهەلوەشاندنا پارتیا کرێکارێن کوردستانێ ،لێ وەکى دیار حەتا نها ئەڤ دەستپێشخەریە ژ لایێ ترکیاڤە هیچ زەلالەیەک و گاڤەک ئەرێنی پراکتیک دیار نینە لەوما ژلایێ هەمی چاڤدێرێن سیاسی و هێزێن دەڤەرێ وەکو گومانەک لسەر رژێما ترکی و سەرەدەریا وێ هەیە بەرامبەر ڤێ دەست پێشخەریێ .
رێزداران ، هەروەسا رژێما ئیرانێ ل هەر وەختەکێ خرابتر و توندتر زولم و زورداریێ ل سەر گەلێ کورد دکەت بسێدارەدان و زیندانیکرن و گەف و هەرەشان ، روژهەلاتێ کوردستانێ و خەباتا وێ بویە ئاستەنگ دگەوریا دەولەتا ئیرانێ دا و هەولا نەهێلانا کلتور و زمان و مێژوویا کوردان ددەت لێ ب پشت راستیڤە ئەڤ خەباتا بەردەوام دێ ئیرانێ ب چوک دادەت وەکى چاوا روژئاڤایێ کوردستانێ بویە سمبولا بەرخودان و ئاشتیێ ل جیهانێ .
بارودوخێ ل هەمیێ تایبەتر باشوورێ کوردستانێ یە و (٣٤) سالێن حوکمرانیا دوو حزبا و دەستێوەردانێن تورکیا و ئیرانێ ل باشوورێ کوردستانێ و توپ و تەیارێن تورکان لسەر باشوورێ کوردستانێ و ناکوکیێن نافمالا کوردى ل باشوورێ کوردستانێ و هەبونا هیێزێن چەکداریێن حزبی بویە مەترسی و ئەگەر کو دوژمن ب ئازادانە وار و ملک و ئابورو و سروشتێ کوردستانێ خراب بکەت ، بێی هەلوێستەک ئان کارڤەدانەکا نیشتمانی ژ لایێ هەردوو پارتێن دەست هەلاتێڤە ل باشورێ کوردستانێ ، بنگەهێن لەشکەریێن ترکیا هەتا نها د بەردەوامن و پێشێلکاریێن خو ل باشور ئەنجام دەن سەرەرای وێ چەندێ کو ئاگربەست هاتیە راگەهاندن ، ئەم ڤان رەفتارێن هوڤانەیێن دەولەتا داگیرکەرا تورکیا رسوا و شەرمزاردکەین و دڤێت ئەڤ بنگەهە بزیترین دەم نەمیننە باشور وە دەستهەلاتا باشور هەوێستێن جدی هەبن بەرامبەر هەبونا ڤان بنگەها .
هەروەسا گرنگە بێژین ل باشورێ کوردستانێ دەرئەنجامێ پارچەکرنا باشور بو زونا زەرو زونا سەوز ژ لایێ هەردوو حزبێن خودان میلئشیات ، مللەتێ باشور زوردلگران کریە زێدەباری ئەڤا هاتیە دیار کرن لاوازیا دیموکراسیەتێ و ئازادیا رادەربرینێ و پێشێلکاریێن دژى مافێ مروڤ و سەختەکاری ل هەلبژاردنادا بگشتى بوینە جهێ دلگرانیێ بو تەڤایا مللەتێ کورد و ئاکنجیێن دەڤەرێ .
ل دوماهێ ل ڤێ مینبەرێ ئەم داخازا سەرکەفتنێن مەزن بو خەباتا مللەتێ خو دکەین ل هەر چار پارچێن کوردستانێ ، داخازێ ل جڤاکێ نێڤ دەولەتى دکەین دەستێوەردانان بکەن ژبو پاراستنا کیانێ روژئاڤایێ کوردستانێ و سەرگرتنا پروسا ئاشتیێ ل تورکیا ، داخازێ ل وان هێزو لایەنێن سیاسى دکەین یێن کو نە ئەندامن ل کونگرێ نەتەوەیێ کوردستان پێداچونێ د پەیام و هزروبیرێن خودابکەن ، داخازێ ژ لایەنێن کوردستانیێن نە ئەندام ل ڤی کونگرەی ئەوژی بهێن ل بن سیبەرا ڤێ سەیهوانا نیشتیمانیڤە کار بکەن ، هیڤیدارم ژ هەمی هێزێن سیاسیێن هەرچار پارچەیێن کوردستانێ ب روحەکا نیشتمانی و دیر ژ کەرب و کین و تولەڤەکرنێ وە لاپەرەکێ نیشیمانی یێ نوى ڤەکەن ژ بۆ خزمەتا کورد و کوردستانێ .
دووبارە سلاڤ و رێز و سەرکەفتن .
پارتیا کەسکا یا باشور و پارتیا کەسکا دیموکرات یا روژئاڤا ، رێکخراوا سەوز یا ئەوروپى و کوردستانى .
بژیت کورد بژیت کوردستان
