نەیا ڤەشارتیە کو شەر وێرانکاریێ لدویڤ خو دئینیت دهەمى رویێن ئابوورى ، سیاسى ، جڤاکى ، کشتوکالى ، ساخلەمى و ژینگەهى و هتد . ئەڤ کارتێکرنە لسەر هندەک بوارا دوم کورتن و هندەک بواران دا ژى دومدرێژن بو نموونە بوارێ ژینگەهێ .
هەلبەتە ئەڤ کارتێکرنە ژى لدویڤ ماوێ شەرى دمینیت و جهێن ئارمانجگرتى ، بو نموونە ئەڤى شەرى هەیڤەک دەربازکر کو تێدا چەندین جورێن چەکێن زەبەلاح هاتینە بکارئینان ، خرابکرنا ژێرخانا ئابوورى و هەرفاندنا چەندین بالەخانا و کوشتن و بریندارکرنا سڤیلا ، خرابکرنا پرێن مەزن و هەتا دوماهیێ و چەند جارا هەول هاتیە دان بو لێدان ل وێستگەهێن ئەتومى کو کارەساتێن مروڤى لدویف خو دئینیت .
ئەگەر ئەم پیچەک هویرتر بەحسێ ڤان کارتێکرنا بکەین دشێین بێژین کو :
پیسکرنا هەوایى
یا دیارە کو دشەرى دا قونبەلەیێن مەزن دهێنە پەقاندن کو گازێن ژەهراوى بەلاڤدکەن و کاردکەتە سەر ژینگەهێ نەبتنێ ژینگەها ئیرانێ بەلکو یا دەوروبەران ژى ، ئەڤ مادێن کیمیایى یێن ژەهراوى هەواى پیس دکەن بشێوەکێ راستەراست کاردکەنە سەر ساخلەمیا مروڤا ، گیانەوەران و رووەکان .
تێکدانا ژینگەهێ
دەمێ شەر بکارئینانا سوپای بیت ئانکو رێکا هشکاتى ، بێگومان دێ دارستان و چیا و داروبار بەرکەڤن و گەلەک گیانەوەر دێ گیانێ خو ژدەست دەن هندەک جارا دارستان دهێنە سوتن و برین ، دڤى شەرى دا لێدان ل کەشتیێن دەریایى دا ژى رویدایە کو دێ بیتە ئەگەرێ مرنا بکوم یا زیندەوەرێن دئاڤێ دا ئەڤە دێ جوراوجوریا سیستەمێ ژینگەها دەریایى تێکدەتن .
گەف لسەر ئاڤێ و سەرچاوێن وێ .
لێدان ل سەرچاوێن ئاڤێ و وان وێستگەهێن ئاڤێ پاقژدکەن دبیتە ئەگەر کو خەلک بمینیتە بێ ئاڤا ڤەخوارنێ کو گەفەکا مەزنە لسەر ژیانێ .
گەف لسەر خوارنێ و سەرچاوێن وێ .
دڤى شەرى دا هێرش هاتیەکرن بو گەلەک جهان کو سەرچاوێن خوارن و ڤەخوارنا هاولاتیان بویە و عەردێ کشتوکالى ژى دەما هاتە تێکدان ئێکسەر ناهێتە قەرەبوکرن ، ئەڤە دێ بیتە ئەگەرێ بەلاڤبونا برسێ دناڤ ئیرانێ دا ، بکارئینانا وان چەکێن کیمیایى هاڤێژ لسەر ئەردێن کشتوکالى دێ بیتە ئەگەرێ ژەهراویکرنا ئاخ و ئاڤ و دێ بەرهەمێ وى ئەردى ژى نەخوشیێن کوژەک لدویف خو ئینیت .
پرسا کوچ و کوچبەریێ .
ئاوارەبوون و دەربەدەرى بەروکا جڤاکێ ئیرانێ نابەردەت هندى شەر یێ بەردەوام بیت ، خەلک بو پاراستنا گیان و مال و سامانێ خو دێ دەربەدەربیت و نەهاوسەنگیا روینشتڤانیێ دێ پەیدابیت ، هندەک جهـ ژبەر شەرى دێ ڤالابن وەکى باژێرێن شەبەحان و هندەک ژى ژدەستێ زوریا رێژا روینشتڤانا دێ تووشى ئاریشەیێن نافخویى ژى بن .
دروویێ ئابوورى دا
ئیران بخو بو ماوێ چەند سالایە لبن ئابلوقا ئابوورى بو ، و پارێ وێ هەمبەر دولارى روژ ب روژ بێبهاتر دبوو ، دماوێ ڤى شەرى دا زێدەتر کەفتە بن بارێ گران و یێ باجێ بدەت تنێ هاولاتیێن ئیرانینە ، ئەڤى شەرى کارتێکرنەکا زورا مەزن کرە سەر ژێرخانا ئابوورى یا ئیرانێ و دێ بو ماوەکێ درێژ باجا ڤى شەرى دەن .
کارتێکرنا دومدرێژ لسەر ساخلەمیێ
دەردانا گازێن ژەهراوى و بەلاڤبوناوان دناڤ هەوای ، ئاخ و ئاڤێ دا دێ ئێکسەر کارکەتە سەر ساخلەمیا مروڤان ژوان توشبون ب نەخوشیێن شێرپەنجێ و تەنگەنەفەسى و تەنانەت کاردکەتە سەر زاروکى دزکێ دەیکێ دا کو دبیتە ئەگەر تێکچونێن زکماکى .
ل دوماهیێ :
زیانێن شەرى زورن و وێرانکاریەکا مەزن لدویف خو دئینیت ، ئەڤ زیانە هندى بەحس بکەین کێمن بتایبەت بکارئینانا چەکێن گران، کاریگەرى دێ د دوم کورت و دوم درێژبن و کارکەنە سەر کوالتیا ساخلەمى وژیانێ ل ئیرانێ و هەروەسا تەفروتوناکرنا ژێرخانا ژینگەهێ ل ئیرانێ .
